Одьулуун нэһилиэгин «Сайдыс» норуот айымньытын дьиэтигэр «Талба талааннар» биэчэрдэрэ.

Ахсынньы 5 күнүгэр Одьулуун нэһилиэгин «Сайдыс» норуот айымньытын дьиэтигэр «Талба талааннар» биэчэр бэрт үрдүк таһымҥа ыытыллынна. Дьон толору тоҕуоруһа мустубут норуот айымньытын дьиэтин фойетыгар сахалыы сиэринэн саламаатынан, алаадьынан айах тутан түмсүүлэр нэһилиэнньэни көрүстүлэр. Ол кэннэ, Одьулуун нэһилиэгин олохтооҕо, талааннаах фотограф Анатолий Макаров быыстапката арыллынна.

Анатолий Алексеевич хаартысканан бэрт соторутааҕыта эрэ дьарыктанан саҕалаабыта эрээри айылҕаттан кыраҕы харахтаах буолан, араас түгэннэри хаартыскаҕа табыгастаахтык түһэрэн интириэһинэй, сэдэх кадрдара элбэхтэр. Кини персональнай быыстапката былырыын Дьокуускай куоракка турбута уонна хаартыскалара «Олонхо Ыһыаҕа» диэн альбомҥа киирбиттэрэ.

Ол кэнниттэн кэлбит дьон-сэргэ нэһилиэктэрин талба талааннаахтарын кэнсиэрин көрөөрү саалаҕа толору куттулла түстэ. Кэлбит көрөөччүлэри нэһилиэк баһылыга Людмила Васильевна Ефремова эҕэрдэлээтэ уонна нэһилиэк общественнай олоҕор бастыҥнарыгар нэһилиэк дьаһалтатын наҕараадаларын туттарда. Бу күн Одьулуун нэһилиэгэр олохтоохтор үөрүүлэрин үрдэтэн гааз ситимэ холбонон күөх төлөн умайбыта бырааһынньыктааҕы киэһээни өссө өрө күүртэ.

Улууспут баһылыга анал дьаһалынан 2016 сыллаахха Чурапчы улууһугар «Норуот айымньытын күнэ» баар буолбута. Культура управлениетын салайааччытын солбуйааччы Айталина Михайловна Смирникова ол туһунан бэйэтин этиитигэр ыйан туран Одьулуун олохтоохторугар, нэһилиэк дьаһалтатыгар махтал тылларын эттэ. Кырдьыга Одьулуун нэһилиэгэ күннэтэ араас дьаһалларынан тиһигин тохтоппокко үлэлиир. Тыа сирин культуратын дьиэтин тула элбэх түмсүү, куруһуок баара нэһилиэнньэ культура сайдыытыгар, нэһилиэк дьоно, ыччата духуобунай сайдыыларыгар кыһамньылааҕын эттэ. Бу күн сценаттан уус-уран самодеятельность кыттыылаахтарыгар араас таһымнаах наҕараадалары туттардылар.

Салҕыы сценаҕа Чурапчы нэһилиэгин баһылыгын солбуйааччыта Петр Егорович Гуляев тахсан бэйэтин эҕэрдэтин тэҥэ «Биир ньыгыл Россия» партия Саха сиринээҕи салаатын эҕэрдэтин уонна «Тыа сирин культурата» программаҕа хапсан Одьулуун нэһилиэгин норуотун айымньытын дьиэтигэр тыас-уус аппаратурата уонна уот-күөс оборудованиета кэлбитин туһунан биллэрдэ. Бу оборудование номнуо кэлэн культура дьиэтэ кырдьык да сэргэхсийбитэ тута көстөр.

Боротокуолунай чаас кэннэ Одьулуун нэһилиэгин түмсүүлэрин, талааннаах дьонун кэнсиэрэ буолла.

Муниципальное казенное учреждение «Чурапчинское улусное управление культуры» МО «Чурапчинский улус (район)»

Контактные телефоны:

8 (41151) 41-501 – приемная;

8 (41151) 41-510 – бухгалтерия;

8 (41151) 41-215 – отдел по методической работе;

E-mail администрации: churcultura@mail.ru, otdelpoov14@mail.ru

Адрес: 678670, Республика Саха (Якутия) Чурапчинский улус, с. Чурапча ул. Ярославского 18 «а»