50 сыллаах айар аартык

50 сыллаах айар аартыкСэтинньи 9 күнүгэр Чурапчы нэһилиэгэр биир дьоһун киэһэ буолан ааста. Ол курдук, 1969 сыллаахха бастакы быыһын көрөөччү иннигэр аспыт РСФСР уонна Саха АССР народнай артиһа П.М.Решетников аатынан Чурапчы народнай театра 50-с үбүлүөйдээх сезонун арыйда.
Бу дьоро киэһэ артистарга уонна айар коллективка бэйэлэрин эҕэрдэлэрин көрөөччүлэр иннилэригэр Чурапчы улууһун баһылыгын социальнай боппуруостарга солбуйааччы Н.И.Аммосов уонна Чурапчы нэһилиэгин баһылыгын эбээһинэһин толорооччу А.Г.Егоров эттилэр. Театр искусствота норуокка наадалааҕын, ыччаты уонна көрөөччүнү кэрэҕэ иитэрин бэлиэтээн туран, таһаарыылаах үлэни, элбэх көрөөччүнү баҕардылар.
Чурапчы народнай театра 1969 сыллаахха “Бочуот Знага” орден кавалера И.И.Кандинскай туруорсуутунан арыллыбыта. Ол сыл нэһилиэк саҥа арыллыбыт кулуубугар С.Омоллоон “Төлөн Ньукуус” спектаклын көрөөччү дьүүлүгэр таһаарбыттара. Онтон ыла 50 сыллаах үтүөнү айар айан саҕаламмыта.
Кэлин театрга режиссерунан ССРС культуратын үтүөлээх үлэһитэ М.А.Герасимова, онтон 34 сыл устата СР культуратын үтүөлээх үлэһитэ Н.М.Заболоцкая, онтон СР культуратын үтүөлээх үлэһитэ И.И.Бушков үлэлээбиттэрэ.
Театр 2003 сыллаахха Хабаровскай куоракка аан бастаан республика театрдарыттан “Дальневосточный бенефис” фестивалга А.Е.Кулаковскай “Ойуун түүлэ” (реж.И.Бушков) кыттан Гран-При үрдүк аатын ылан кэлбитэ. Онтон 2015 сыллаахха бу ситиһиитин Ч.Айтматов “Ийэ сирэ” драматынан хатылаабыта. 2016 сыллаахха Иркутскайга “Сибирская рампа” аан дойдутааҕы фестивальга дипломант буолбута. Саха сирин народнай театрдарын сайдыытын 50 сыллаах историятыгар “Республика бастыҥ народнай театра” анал ааты ылбыта.
50 сыллаах айар аартыкБу киэһэ театр айар коллектива эдэр режиссер Аркадий Васильев туруоруутугар народнай суруйааччы В.С.Яковлев – Далан “Дьикти саас” спектаклы көрөөччү дьүүлүгэр таһаардылар. Бу спектакльга театр үс көлүөнэ араас артистара оонньоотулар. Сүрүн оруолларга Петр Дьяконов, Татьяна Хомподоева, Надежда Заболоцкая, Валерий Герасимов, Дмитрий Кириллин, Николай Хоютанов, Семен Жендринскай, Айылгы Муосчут кыыһа Пинигина, Юрий Толстоухов, Петр Климов уонна да атыттар оонньоотулар.
Чурапчы народнай театра бу дьоро киэһэнэн бэйэтин үбүлүөйдээх сылын саҕалаата!

И.Бушков.

Муниципальное казенное учреждение «Чурапчинское улусное управление культуры» МО «Чурапчинский улус (район)»

Контактные телефоны:

8 (41151) 41-501 – приемная;

8 (41151) 41-510 – бухгалтерия;

8 (41151) 41-215 – отдел по методической работе;

E-mail администрации: churcultura@mail.ru, otdelpoov14@mail.ru

Адрес: 678670, Республика Саха (Якутия) Чурапчинский улус, с. Чурапча ул. Ярославского 18 «а»