ЧУРАПЧЫГА — «ТАЛБА ТАЛААННАР» НОРУОТ АЙЫМНЬЫТЫН ДЕКАДАТА

ЧУРАПЧЫГА – НОРУОТ АЙЫМНЬЫТЫН ДЕКАДАТА
2016 сыллаахха «Чурапчы улууһа (оройуона)» Муниципальнай тэриллии баһылыгын алтынньы ый 11 күнүнээҕи «О Дне народного творчества в Чурапчинском улусе» уурааҕынан сэтинньи бастакы бээтинсэтигэр норуот айымньытын күнэ олохтоммута. Ол кэмтэн улууспутугар сыллата бэлиэтэнэр. Быйыл сэтинньи 2 күнүттэн 10 күнүгэр диэри декада быһыытынан ыытыллар.
Сэтинньи 2 күнүгэр «Айылгы» культура киинигэр Ольга Ноева «Айар күн» авторскай проега Сардана Кузьмина «Дууһам ыллыыр» музыкальнай биэчэринэн сүрэхтэннэ. Тэрээһин сыалын-соругун «Айыллаан» сынньалаӊ киинин уус-уран салайааччыта, проект автора сырдатта: «Айар күн» проект концепциятынан Чурапчы талааннаах дьонун тэттик эйгэҕэ таһааран камернай тэрээһиннэри ыытыы буолар. Музыкальнай салон, ырыа киэһэтин форматынан барар. Проекпыт бастакы геройунан оҕо эрдэҕиттэн ырыаны аргыс оӊостубут, талааннаах, ураты күүстээх куоластаах Сардана Кузьмина буолла. Кини аҕатын Василий Кузьмин аатын кэриэстиир, үйэтитэр биэчэри оӊордо. Тэрээһиммитин 50 киһиэхэ ааҕыммыппыт да 70-ча киһи сырытта. Кэнсиэр кэнниттэн сүрдээх үчүгэй, позитивнай сыанабылы тутаммыт номнуо аныгыс «Айар күнү» күүтэбит. Саӊа дьылга диэри өссө биир проегы олоххо киллэрэргэ былаанныыбыт.
Кэнэҕэскитин бу проект геройдарынан талааннаах, баҕалаах дьон барыта буолуон сөп: уһуйаан иитиллээччититтэн саҕалаан дьиэ кэргэнинэн кыттыыга тиийэ, улууспут мелодистара, айар-тутар дьоно. Биһиги ылсаммыт ситэрэн-хоторон, сүбэлээн-амалаан, биэчэрин программатын таӊан биэрэн киэӊ эйгэҕэ тахсалларыгар көмөлөһөбүт. Манна даҕатан эттэххэ, оҕолорун, айар талааннаах чугас дьонун кэнсиэрдэтиэн баҕалаах дьон элбэх. Ол эрэн, хайдах, туохтан саҕалыахтарын билбэттэр. Улахан кэнсиэри тэрийии, биллэн турар, элбэх сыраттан, хамаанда үлэтиттэн, үптэн-харчыттан тутулуктанар буоллаҕа. «Айар күн» оннук буолбатах. Тэттик араӊаҕа аналлаах альтернативнай көрүӊ диэххэ сөп. Мантан кынаттананнар улахан сыанаҕа кэнсиэрдиир кыахтарын арыйаллар, бэйэлэрин холонон көрөллөр. Проект буолан финансовай өрүттээх, киирии билеттээх.
Бу проегым олоххо киирэригэр өйөөбүт «Айыллааным» коллективыгар, директорбар Розалия Игнатьеваҕа, «Айылгы» культура киинигэр барҕа махталбын тиэрдэбин».

Сэтинньи 3 күнүгэр «Айылгы» культура киинигэр улууспут уус-уран самодеятельноһа кыттыылаах «Талба талааннар» кэнсиэр ыытылынна. Нэһилиэктэртэн куруһуоктар, түмсүүлэр истэринэн баар айар коллективтар, Аксения Посельская уонна Андрей Гоголев аатынан оҕо искусствотын оскуолалара, вокальнай-инструментальнай ансамбыллар, народнай коллективтар кыттыылаах чаҕылхай, истиӊ-иһирэх кэнсиэр ааста.
Культура управлениета, «Айылгы» сынньалаӊ киинэ араас хабааннаах тэрээһиннэргэ мэлдьи кыттар сольнай нүөмэрдэрбитигэр, коллективтарбытыгар махтанабыт. Бу да сырыыга Хатылы нэһилиэгин кэскиллээх хореограба Елена Заборовская «Алгыс», «Күндүл» үӊкүү коллективтарынан, Сылаӊ нэһилиэгиттэн Егор Макаров салайыылаах «Күбэйэ» аҕам саастаахтар үӊкүүлэрин коллективынан, «Харса суох хатылылар» Ирина Слепцова көр-күлүү бөлөҕүнэн, Одьулуунтан Алексей Аржаков «Сардаӊа» оҕо үӊкүү ансамблынан кыттан кэнсиэрбитин киэргэтиэхтэрин киэргэттилэр. Маны тэӊэ, ырыаны ымыы гыммыт күүстээх куоластаах Сардана Кузьминаны уонна Егор Захаровы көрөөччү хойуу ытыс тыаһынан көрүстэ. Кэлэр көлүөнэ аатыттан «Алаас сибэккилэрэ» улуустааҕы оҕо айымньытын конкурсун Гран-При кыайыылааҕа Дима Никонов эҕэрдэлээтэ.
Оҕо искусствотын оскуолалара үөрэхтээһин таһынан социальнай хабааннаах тэрээһиннэргэ мэлдьи кытталлар. Кэрэ көстүү, мааны быһыы-таһаа, ыраас куолас көрөөччүлэри классика абылаӊнаах «дойдутугар ыалдьыттатан» сынньатта, уоскутта.
Кэнсиэрбит чаҕылхай кыттааччыларынан Борисовтар дьиэ кэргэн «Халлааӊӊа үрдэл» вокальнай-инструментальнай ансамбль буолла. Быйыл «Музыкальная семья» бастакы республиканскай аһаҕас конкурска Гран-При ааты ылан кэнсиэрбитигэр өрө күүрүүлээхтик хас да репертуары оонньоотулар. Аҕа баһылык Айсен Гаврильевич уолаттарын музыка кэрэ эйгэтигэр сыһыаран оҕону иитии биир ньыматын холобурдуур, пропагандалыыр.
Бу конкурска иккис миэстэни ылбыт Одьулуун нэһилиэгиттэн Ирина Дьяконова уолунаан флейтаҕа оонньоон көрөөччүлэри сэргэхситтэ.
Норуот айымньытын биир ураты, айар-тутар көстүүтүнэн народнай коллективтар үлэлэрэ-хамнастара буолар. Самодеятельнай бөлөхтөргө ырыа-үӊкүү, артыыстааһын үрдүкү форматын холобура буоланнар мэлдьи бэйэлэрин сайыннараллар, үүнэллэр-сайдаллар. Хоптоҕо нэһилиэгиттэн «Күбэй» вокальнай ансамбль, «Көлүкэчээн», «Дьиэрэӊкэй» оҕо үӊкүү народнай ансамбллара, Мындаҕаайытаа5ы «Быара суохтар» народнай театр нүөмэрдэрин көрөөччү ытыс тыаһынан сыаналаата.
Кэнсиэр сонун, сэргэх нүөмэринэн Мугудай нэһилиэгиттэн «Эмодзи» оҕо студията буолла. Салайааччынан республика циркэтигэр артыыһынан үлэлии сылдьыбыт Ярослав Лебедев буолар. Бу студия быйылгы ситиһиитэ элбэх: Сергей Расторгуев бирииһигэр 9-ус республикатааҕы цирковой оҕо фестивалыгар 1 миэстэ, «Бастыӊ цирковой коллектив», «Бастыӊ клоун» номинация хаһаайыттара, 1, 2, 3, степень лауреаттара, маны тэӊэ, «Мамонтенок» 19 республиканскай цирковой фестиваль — конкурс Гран-При кыайыылаахтара.
Бахсы нэһилиэгин «Эрэл» үӊкүү бөлөҕө (сал. Надежда Местникова), иккис тыыннарын ылан дьарыктанан эрэр Болтоӊо нэһилиэгин «Чуораайы» вокальнай ансамбла (сал. Александра Максимова), Чурапчы нэһилиэгин «Чолбон» эдэр ыччат үӊкүүтүн коллектива (сал. Иннокентий Поисеев) тэрээһиммитин ситэрэн-хоторон биэрдилэр. Үлэлээн-хамсаан эрэр саӊа коллективтарга таһымӊытын мэлдьи үрдэтэ, репертуаргытын хаӊата сылдьаргытыгар баҕарабыт.
Кэнсиэргэ уопсайа 145 кыттааччы кытынна, көрөөччү саалата тобус-толору дьонунан туолла. Маннык хабааннаах улахан кэнсиэр сылга аҕыйахта ыытыллар. Саамай сүрүннэринэн улуустааҕы уус-уран самодеятельность фестивалын гала-кэнсиэрэ уонна норуот айымньытын декадатын чэрчитинэн ыытыллар «Талба талааннар» кэнсиэр буолар.

Сэтинньи 6 күнүгэр «Айылгы» культура киинин саалатыгар Чурапчы улууһугар оҕо уонна ыччат дьоҕурун сайыннарыы сылын чэрчитинэн Дьулустан Васильев камернай кэнсиэрэ буолан ааста. Аксения Посельская аатынан Дириӊнээҕи оҕо искусствотын оскуолатын уһулуччу талааннаах иитиллээччитэ Дьулус Васильев баян отделениетыгар үөрэнэр. Ону таһынан, баҕа өттүнэн фортепианоҕа интэриэһиргээн дьарыктаммыта сыл аӊаара буолан эрэр эбит. Республикаҕа ыытыллар араас таһымнаах конкурстарга кыттан ситиһиитэ, кыайыыта-хотуута элбэх. Фортепианоҕа уонна баяӊӊа омуктуу, нууччалыы, сахалыы биэстии айымньылары оонньообутугар көрөөччүлэр уоскуйдубут, ыгыллыыбыт-тыӊааһыммыт уһулунна, санаабыт көтөҕүллэн тарҕастыбыт. Ахсынньы ыйга Аксения Посельская аатынан Дириӊнээҕи оҕо искусствотын оскуолатын иитиллээччилэрэ кэнсиэр көрдөрөөрү бэлэмнэнэллэр, онно сэӊээрээччилэр сылдьаргытыгар ыӊырабыт.

Муниципальное казенное учреждение «Чурапчинское улусное управление культуры» МО «Чурапчинский улус (район)»

Контактные телефоны:

8 (41151) 41-501 – приемная;

8 (41151) 41-510 – бухгалтерия;

8 (41151) 41-215 – отдел по методической работе;

E-mail администрации: churcultura@mail.ru, otdelpoov14@mail.ru

Адрес: 678670, Республика Саха (Якутия) Чурапчинский улус, с. Чурапча ул. Ярославского 18 «а»