БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ

БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ

БОЛТОӉОҔО ҮТҮӨ ТҮҺҮЛГЭ ТӨРҮТТЭННЭ

Ахсынньы 24 күнүгэр Таатта үрэх тардыылаах, таалар налыы сыһыылаах, өӊ буордаах, быйаӊ эӊэрдээх Болтоӊо нэһилиэгэр тускулаах түһүлгэ тэрилиннэ. Үтүө ааттарынан киэн туттар, сүгүрүйэ ахтар-саныыр дьоммут — суруйааччы, ССРС суруйааччыларын союһун чилиэнэ, гражданскай уонна Аҕа дойду улуу сэриилэрин кыттыылааҕа, Ленин, Бочуот бэлиэтэ, Албан аат уордьаннар кавалердара Степан Афанасьевич Саввин – Күн Дьирибинэ 115 уонна РСФСР үтүөлээх, Саха АССР народнай артыыһа, “Ленин” орденын кавалера, үгүс оруолу оонньообут сахалартан бастакы биллиилээх артыыс Виктор Афанасьевич Саввин 110 сылларыгар аналлаах түмүк дьаһал буолан ааста. Маны сэргэ, Бииктэр Саабын албан аатын сүгэр Норуот айымньытын дьиэтэ өрөмүөн кэнниттэн ситэн-хотон, тупсан, үлэҕэ киирбитэ кэрэни кэрэхсиир, норуот айымньытын айылгылыыр, талба талааннаахтар мустар уйалара буолбутуттан дьон-сэргэ үөрүүтэ үс бүк буолла.

Кэлбит ыалдьыттары нэһилиэк общественнай түмсүүлэрэ сылаас саламааттаах, итии чэйдээх сандалынан көрүстүлэр. Фойеҕа ини-бии Саввиннар айар үлэлэрин сырдатар быыстапка турда. Маны тэӊэ, уран тарбахтаахтар Наталья Логинова, Варвара Картузова, Мария Попова, Апон Андросов о.д.а. выставкалара тэриллибитин Татьяна Ефремова кэпсээтэ.

Үрүӊ Бас Болтоӊо саха норуотугар үгүс чулуу дьону бэлэхтээбит ытык түөлбэ буолар. Бу сыл устата ыытыллыбыт юбилейнай тэрээһиннэр көннөрү дьаһал эрэ быһыытынан буолбакка, кэнэҕэски көлүөнэни иитэр-үөрэтэр, дьоһун дьоммутун үйэтитэр сыаллаах аастылар.

Саввиннар аймах биһиги норуокка үгүс талааннах дьону иитэн-үөрэтэн таһаардылар.

Оҕо сааһыттан сытыы-хотуу, булугас өйдөөх, үлэни-хамнаһы кыайымтыа буола улааппыт Степан Афанасьевич Саввин – Күн Дьирибинэ литератураҕа чэпчэкитэ суох жанрга айан-тутан үгэһит, сатирик уонна фельетонист быһыытынан үүммүтэ. Сардаана Ойунская ахтыытыгар Ыстапааны “Якутскай драмтеатр тирэхтэммит национальнай труппатыгар самодеятельнай артыыс быһыытынан сылдьыбыта. Көрдөөх, үтүө майгылаах, дьээбэлээх-хооболоох этэ, ол гынан баран артыыс буолбакка суруйар төрүтэ баһылаабыт” диэн бэлиэтээбит.

Виктор Афанасьевич Саввин “Дьоллордоох тускубун туһулаан биэрбитэ” диэн бэйэтэ суруйан хаалларбыт ахтыытыгар кылгастык олоҕун сүрүн кэрдиис кэмнэрин бэлиэтээбититтэн биири өйдүөххэ сөп: айылҕаттан артыыс буолуох үрдүк дьоҕурун батарбакка, баҕа санаатыгар бэриниилээх буолан, ону тилиннэрэн, бу олоххо тутаах сыалын-соругун сиппитэ.

Манна даҕатан эттэххэ, күтүөтүттэн Былатыан Ойуунускайтан сүбэ-соргу көрдөөн, саһыаран илдьэ сылдьыбыт бүччүм санаатын таба эттэрэн, баҕа санаатын бөҕөргөтөн булгу артист буоларга быһаарыммыт.

Түмүгэр бэлиэтээбит: “Онон, Саха театрын сыанатыгар 42 сыл тохтоло суох үлэлээн кэллим. Бу устатыгар 170-ча оруолу төһө күүһүм кыайарынан үлэлээн толортоотум. Онтон драмкуруһуокка кыттыбыт сылларбын аахтахха, артыыс идэтигэр сыстыбытым 50 сыл устата буолбут” диэн.

Нэһилиэк баһылыга Варвара Макарова бу сыл ыытыллыбыт тэрээһиннэри билиһиннэрдэ, В.А.Саввин аатынан Норуот айымньытын дьиэтин өрөмүөнүгэр үлэлээбит дьоӊӊо, биир дойдулаахтарыгар наҕараада туттартаата. Нэһилиэк депутаттарын Сэбиэтин быһаарыытынан “Болтоӊо нэһилиэгин бочуотунай олохтооҕо” ааты Анастасия Петроваҕа иӊэрдилэр.

“Чурапчы улууһа (оройуона)” Муниципальнай тэриллии баһылыгын социальнай политикаҕа уонна олохтоох бэйэни салайыныыга солбуйааччы Николай Аммосов, Чурапчы улууһун культуратын, искусствотын үлэһиттэрин аатыттан “Айылгы” Культура киинин директора Гаврил Лыткин, улуус нэһилиэктэрин баһылыктара, Болтоӊоттон төрүттээх биир дойдулаахтар түмсүүлэрэ, тэрилтэ салайааччылара, общественность истиӊ тылларын анаан эйэҕэстик эҕэрдэлээтилэр.

Уус-уран самодеятельность кыттыылаахтара Семен Васильев, Дария Капрынова, “Уйгулаана” бөлөх, эр дьон ансамбла, норуот айымньытын дьиэтин коллектива ыллаан-туойан, үӊкүүлээн музыкальнай эҕэрдэлэрин бэлэхтээтилэр.

Ини-бии Саабыннар үбүлүөйдээх дьылларыгар аналлаах сыл сабыллыыта уонна Арассыыйа Президенин ыйааҕынан 2019 сылга Театр сыла биллэриллибитин аһыллыыта Виктор Афанасьевич кыыһа Варвара Саввина уонна Российскай Федерация государственнай премиятын лауреата, Саха Республикатын үтүөлээх артыыһа Иннокентий Луковцев этиилэринэн биллэрилиннэ.

Саха Республикатын народнай артыыһа, Суорун Омоллоон аатынан опера уонна балет государственнай театрын солиһа Григорий Петров кэрэ толоруутунан көрөөччүлэри абылаата.

Кэлэн иһэр саргылаах саӊа дьылынан культура эйгэтигэр сыһыаннаах, үлэлии сылдьыбыт үлэһиттэр бэлэх уунан лотерея оонньоттулар.

Үтүө тэрээһин П.А.Ойуунускай аатынан Саха Академическай театрын “Наара Суох” спектаклынан түмүктэннэ.

 

Мария Васильева.

 

 

Муниципальное казенное учреждение «Чурапчинское улусное управление культуры» МО «Чурапчинский улус (район)»

Контактные телефоны:

8 (41151) 41-501 – приемная;

8 (41151) 41-510 – бухгалтерия;

8 (41151) 41-215 – отдел по методической работе;

E-mail администрации: churcultura@mail.ru, otdelpoov14@mail.ru

Адрес: 678670, Республика Саха (Якутия) Чурапчинский улус, с. Чурапча ул. Ярославского 18 «а»