ТӨРӨӨБҮТ ДОЙДУГА ТАПТАЛЫ ӨРӨ ТУТАН

ТӨРӨӨБҮТ ДОЙДУГА ТАПТАЛЫ ӨРӨ ТУТАН

 

Ахсынньы 15 күнүгэр Хоптоҕо нэһилиэгэр толорооччу – автор, «Айар кут» Чурапчы улууһун мелодистарын чилиэнэ Александр Иванов “Төрөөбүт дойдубар тапталым” бастакы сольнай кэнсиэрин оӊордо.

Кэнсиэргэ Александр бэйэтэ ыллаата, маны тэӊэ биир дойдулаахтара, Чурапчыттан, Одьулуунтан, Сылаӊтан, Дьокуускайтан мелодистар, ырыаһыттар, “Сыккыс” ансамбль Александр ырыаларын ыллаан кэнсиэри ситэрэн-хоторон, киэргэтэн биэрдилэр. Саха Республикатын культуратын туйгуннара Спиридон Готовцев, Прокопий Тарабукин баяӊӊа доҕуһуоллаатылар.

Александр дьоҕурун таба тайанарыгар, сайыннарарыгар олук уурбут, улахан оруоллаах киһинэн ийэтэ Марфа Семеновна буолар. Уола музыканы сэҥээрэрин, сыстаҕаһын бэлиэтии көрөн бастаан проигрыватель, гармошка, онтон баян ылан биэрбитэ. Инньэ гынан Саша тус бэйэтэ слуҕунан дьарыктанан, баяҥҥа сыыйа үчүгэйдик оонньуур буолбута. Күтүөтэ Николай Яковлев уонна улууска, республикаҕа биллибит баянист Иван Абрамов эмиэ төһүү күүс буолбуттара.

1991 сылтан мелодия айарга холонон барбыта. Аан бастакы ырыатын тылларын бэйэтэ суруйан, күндү киһитигэр ийэтигэр анаан, “Ийэбэр” диэн олус иэйиилээх иһирэх ырыатын айбыта. Онтон ыла билигин 40-ча ырыалар автордара. Олоххо-кэрэҕэ тардыһыылаах, инникигэ дьулуурдаах буолан, айылҕа биэрбит дьоҕурун, талаанын сайыннаран дойдутугар Чурапчы улууһугар биир биллэр ырыа айааччы буолан, дьон-сэргэ сэҥээриитин, биһирэбилин ылла. Александр айар ырыалара умнуллубат оҕо саас кэрэ кэмнэрин, тулалыыр айылҕа кэрэтин, төрөөбүт дойдуга тапталы, үлэһит дьону хоһуйаллар.

Александр общественнай олохтон туора турбат. Ол курдук доруобуйаларынан хааччахтаах дьон улуустааҕы уонна республиканскай фестивалларыгар, араас таһымнаах ырыа куонкурустарыгар мэлдьи ситиһиилээхтик кыттарын кини элбэх наҕараадалара туоһулууллар.

2006 с. “Дьоллоох буол куруутун олоххор”, 2011 с. “Төрүт буор тардыыта” диэн дискэлэргэ ырыаларын түмэн таһаартарбыта, ити дискэлэр истиҥ иһирэх ис хоһоонноох сүрэхтэниилэрэ Мындаҕаайыга уонна Чурапчыга буолан ааспыттара.

Саша киһи быһыытынан сүрдээх сэмэй, киэҥ холку майгылаах, истиҥ-эйэҕэс сыһыаннаах, сырдык ыраас санаалаах буолан кинини тулалыыр чугас дьоно, алтыһар доҕотторо олус сөбүлүүллэр, убаастыыллар, үрдүктүк сыаналыыллар.

Бастакы кэнсиэринэн Хоптоҕо нэһилиэгин дьаһалтата, Чурапчы улууһун культуратын салаата, республика ырыа айааччыларын обществота, улуус мелодистарын “Айар кут” түмсүүтэ, “Үрдэл” норуот айымньытын дьиэтэ, “Тирэх” доруобуйаларынан хааччахтаах дьон обществота, олорор түөлбэтэ эҕэрдэлээтилэр.

Муниципальное казенное учреждение «Чурапчинское улусное управление культуры» МО «Чурапчинский улус (район)»

Контактные телефоны:

8 (41151) 41-501 – приемная;

8 (41151) 41-510 – бухгалтерия;

8 (41151) 41-215 – отдел по методической работе;

E-mail администрации: churcultura@mail.ru, otdelpoov14@mail.ru

Адрес: 678670, Республика Саха (Якутия) Чурапчинский улус, с. Чурапча ул. Ярославского 18 «а»